ಉಜಿರೆ: ಕುರಿಯ ಸಂಸ್ಮರಣೆ, ಪ್ರಶಸ್ತಿ ಪ್ರದಾನ
ಲೇಖಕರು : ಸತೀಶ್ ನಾಯಕ್ , ಪಕಳಕು೦ಜ
ಸೋಮವಾರ, ಡಿಸೆ೦ಬರ್ 1 , 2014
|
ಡಿಸೆ೦ಬರ್ 1, 2014
|
ಉಜಿರೆ: ಕುರಿಯ ಸಂಸ್ಮರಣೆ, ಪ್ರಶಸ್ತಿ ಪ್ರದಾನ
ಬೆಳ್ತಂಗಡಿ :
ಯಕ್ಷಗಾನವು ಸಂಸ್ಕೃತಿ, ಸಂಸ್ಕಾರವನ್ನು ಉಳಿಸಿಕೊಂಡು ಪಾರಂಪರಿಕವಾಗಿ ಧರ್ಮವನ್ನು ಜಾಗೃತಿಗೊಳಿಸುವ ಕಾರ್ಯಕ್ರಮ ಎಂದು ಕನ್ನಡ ಸಾಹಿತ್ಯ ಪರಿಷತ್ ಮಾಜಿ ರಾಜ್ಯಾಧ್ಯಕ್ಷ ಹರಿಕೃಷ್ಣ ಪುನರೂರು ಹೇಳಿದರು.
ಉಜಿರೆ ಜನಾರ್ದನ ದೇವಸ್ಥಾನದ ಶ್ರೀ ರಾಮಕೃಷ್ಣ ಮಂಟಪದಲ್ಲಿ ಕುರಿಯ ವಿಠಲ ಶಾಸ್ತ್ರಿ ಯಕ್ಷಗಾನ ಪ್ರತಿಷ್ಠಾನ ಮತ್ತು ನೆಡ್ಲೆ ನರಸಿಂಹ ಭಟ್ಟ ಯಕ್ಷಗಾನ ಪ್ರತಿಷ್ಠಾನ ನೇತೃತ್ವದಲ್ಲಿ ಕಲೆ-ಕಲಾವಿದ-ಪೋಷಕ ಕೆ.ವಿ. ಮುಚ್ಚಿನ್ನಾಯ ನೆನಪಿನ ಯಕ್ಷಗಾನ ತಾಳಮದ್ದಳೆ ಸಪ್ತಾಹ ಸಂದರ್ಭ ಕುರಿಯ ಸಂಸ್ಮರಣೆ, ಪ್ರಶಸ್ತಿ ಪ್ರದಾನ, ಗೌರವಾರ್ಪಣೆ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.
ಇಂದಿನ ದಿನಗಳಲ್ಲಿ ಹಿರಿಯರನ್ನು ನೆನಪಿಸುವ ಕೆಲಸ ಆಗಬೇಕಾಗಿದೆ. ಹಿರಿಯರ ಅನುಗ್ರಹ ಕಿರಿಯರಿಗೆ ಮಾರ್ಗದರ್ಶನವಾಗಬೇಕು. ಇಂತಹ ಕಾರ್ಯಕ್ರಮಗಳಿಂದ ಯಕ್ಷರಂಗದಲ್ಲಿ ದುಡಿದವರನ್ನು ಗುರುತಿಸಿ ಗೌರವಿಸುವ ಕಾರ್ಯ ಆಗುತ್ತಿದೆ ಎಂದರು.
ವಿಶ್ರಾಂತ ಉಪನ್ಯಾಸಕ, ಅರ್ಥಧಾರಿ ಎಸ್. ರಾಮ ಭಟ್ ಕಾರ್ಕಳ ಅವರು ಕುರಿಯ ಮತ್ತು ನೆಡ್ಲೆಯವರ ಸಂಸ್ಮರಣೆ ಮಾಡಿ, ಕುರಿಯ ವಿಠಲ ಶಾಸ್ತ್ರಿಯವರು ಯಕ್ಷರಂಗದ ಭೀಷ್ಮ. ಅವರು ಪುರಾಣ ಪ್ರಸಂಗದ ಪಾತ್ರಗಳನ್ನು ಜೀವಂತವಾಗಿ ಮೂಡಿಸುತ್ತಿದ್ದರು. ಅವರು ಕಲೆಯ ರಸದೌತಣವನ್ನು ಪ್ರೇಕ್ಷಕರಿಗೆ ಉಣಬಡಿಸುತ್ತಿದ್ದರು. ನೆಡ್ಲೆ ನರಸಿಂಹ ಭಟ್ ಹಿಮ್ಮೇಳದ ಮಹಾನ್ ವಿದ್ವಾಂಸರಾಗಿದ್ದರು ಎಂದರು.
ಉಜಿರೆ ದೇವಸ್ಥಾನದ ಆಡಳಿತ ಮೊಕ್ತೇಸರ ಯು. ವಿಜಯ ರಾಘವ ಪಡ್ವೆಟ್ನಾಯ ಮಾತನಾಡಿ, ಯಕ್ಷಗಾನ ಗಾಯನ, ನರ್ತನ, ವಾದನ, ಸಾಹಿತ್ಯ, ಅರ್ಥಗಾರಿಕೆಯ ಸಮ್ಮಿಲನ. ಇದು ಪಾರಂಪರಿಕ, ಅರ್ಥಪೂರ್ಣವಾಗಿ ನಡೆಯಬೇಕು ಎಂದರು.
ವಿಮರ್ಶಕ, ಅರ್ಥಧಾರಿ ಡಾ. ಎಂ. ಪ್ರಭಾಕರ ಜೋಷಿ ಅವರು ಕಲಾವಿದ- ಪೋಷಕ ಕೆ.ವಿ. ಮುಚ್ಚಿನ್ನಾಯ ಅವರ ಸಂಸ್ಮರಣೆ ಮಾಡಿದರು. ವಿಶ್ರಾಂತ ಅಧ್ಯಾಪಕ, ಅರ್ಥಧಾರಿ ಬರೆ ಕೇಶವ ಭಟ್ ಅವರು ಕುರಿಯ ಪ್ರಶಸ್ತಿ ಸ್ವೀಕರಿಸಿದರು. ಕೆ.ವಿ.ಮುಚ್ಚಿನ್ನಾಯರ ಪತ್ನಿ ಸುಶೀಲಾ ದೇವಿ ಮುಚ್ಚಿನ್ನಾಯ, ಕುರಿಯ ಗಣಪತಿ ಶಾಸ್ತ್ರಿ ಉಪಸ್ಥಿತರಿದ್ದರು.
ಇದೇ ಸಂದರ್ಭ ಯಕ್ಷಗಾನದ ಅರ್ಥಧಾರಿಗಳು, ಸಂಘಟಕರಾದ ಎಸ್.ಎನ್. ಪಂಜಾಜೆ, ರವಿ ಅಲೆವೂರಾಯ ವರ್ಕಾಡಿ, ಗೋಪಾಲ ಶೆಟ್ಟಿ ಕಳೆಂಜ, ಕುಳಾಯಿ ವಾಸುದೇವ ಆಚಾರ್ಯ, ಶೇಖರ ಮಣಿಯಾಣಿ ಅವರನ್ನು ಗೌರವಿಸಲಾಯಿತು.
ಕುರಿಯ ಪ್ರತಿಷ್ಠಾನದ ಸಂಚಾಲಕ ಉಜಿರೆ ಅಶೋಕ್ ಭಟ್ ಸ್ವಾಗತಿಸಿ, ಪ್ರಾಸ್ತಾವಿಕ ಮಾತನಾಡಿ, ಸನ್ಮಾನಿತರನ್ನು ಪರಿಚಯಿಸಿದರು. ಗೇರುಕಟ್ಟೆ ದಿವಾಕರ ಆಚಾರ್ಯ ಕಾರ್ಯಕ್ರಮ ನಿರ್ವಹಿಸಿದರು. ಅಧ್ಯಾಪಕ ಜನಾರ್ದನ ತೋಳ್ಪಾಡಿತ್ತಾಯ ವಂದಿಸಿದರು. ಕುರಿಯ ಗಣಪತಿ ಶಾಸ್ತ್ರಿ ಅವರ ಭಾಗವತಿಕೆಯಲ್ಲಿ ಭೀಷ್ಮ ಪರ್ವ ತಾಳಮದ್ದಳೆ ಹಾಗೂ ಮಹಿಳಾ ಯಕ್ಷಕೂಟ- ಕದ್ರಿ ಅವರಿಂದ ಜಾಂಬವತಿ ಕಲ್ಯಾಣ ಯಕ್ಷಗಾನ ಬಯಲಾಟ ನಡೆಯಿತು.
ಕೃಪೆ :
http://www.vijaykarnataka.com
|
|
|